الدكتور ماهر العباسي : عندنا مئات ألاف الحالات من الإصابات بفيروس كورونا في تونس و وجب رفع الحجر الصحي العام

كعادته ،غرّد الدكتور ماهر العباسي المختص في الإنعاش و التخدير خارج السرب اذ اعتبر في تدوينة مطولة نشرها على حسابه بالفايسبوك ،أن عدد الإصابات المؤكدة بفيروس كورونا في تونس تعدّ بعشرات الألاف إن لم تكن بمئات الألاف ،معتبرا أن الحجر الصحي العام لن يحل المشكل و هذا نص التدوينة :

ممكن طويل برشة أما نتصورو تلخيص مهم باش الناس تفهم شنية المشكلة الخطيرة في إستراتيجية تونس ضد الوباء . هذا وباء يتعدا كيف الڤريپ دونك تطلع للسماء تهبط باش يتفشى في بلادك ولهذا حكاية عنا 700 حالة راو حكاية أمّي سيسي مايصدقها كان إنسان ساذج أحنا في تونس عنا عشرات آلاف الحالات كان موش مئات الآلاف متاع الحالات ….. وهوني مربط الفرس في الإختلاف الجذري في وجهات النظر . * وزارة الصحة إختارت التمشي التالي : GO and STOP شمعناها ؟ معناها التراخي التام مالأوّل وبعد التسكير التام والمبالغ فيه . كيفاش ؟ مالأوّل رفض تسكير الحدود مع إيطاليا ولآخر لحظة والموتى بالآلاف خلاو طيارة مع ميلانو والي يهبطو يقيسولهم السخانة ويقولولهم شدو دياركم بالثقة . خلات الحدود محلولة مع ليبيا . خلات ماتش المكشخة يصير ب50 الف متفرج …ماخذاتش قرار تسكير المكاتب بل تقديم العطلة خلات المكاتب الفرنسيس محلولين إرضاءا للسفير الفرنسي .. خلات الجوامع محلولين …

مرة حبت تعمل حجر صحي إجباري لجماعة جايين من منطقة موبوؤة كيف شدو صحيح قالتلهم باهي روحو لدياركم ….. وبعد فترة الGO هذي إنطلقت في فترة STOP بسرعة جنونية سكّر الحدود سكّر الستادات سكّر المكاتب الفرنسيس سكّر الجوامع و هذا كان ممتاز وربحنا بيه الوقت الي خسرناه بالتراخي متاع الجمعتين الاولين متاع مارس .والي كانت تنجم تكون نتائجو كارثية ….

ولكن ماصار شيء الهدوء التام لا موتى لا مرضى في الإنعاش ….وفي نفس الوقت إكتشاف حالات تعدات بالكورونا من مصر من جماهير الترجي الي حضرو بعد في لقاء الاياب متاع الخمسين ألف متفرج . هوني المنطق السليم كان يفرض علينا الأسئلة التالية : * قداش من مشجع تعدا في مصر ؟ وقداش من مشجع تعدا في رادس ؟ وكل طبيب يتصور أنهم موش بالعشرات ننصحو يراجع حساباتو ===> الفيروس هرب علينا ودخل لتونس من 29 فيفري وممكن ياسر قبل وتفشى في البلاد * السؤال الثاني : باهي علاش ماعناش برشة وفايات ومرضى في الإنعاش ؟؟ ===> وكان يطلع الفيروس هذا ماعندوش نفس الخطورة في بلادنا كيما في البلدان الأخرى ؟ هوني. مربط الفرس متاع الإختلاف الي عندي مع تمشي الوزارة . يظهرلي التمشي الأفضل كان يكون الSTOP and GO يعني الإغلاق السريع للحدود والحجر الإجباري والتحليل لكل الوفدين …

إغلاق المدارس والجوامع والملاعب من أول مارس ونعملو تحاليل au hasard باش نتبعو تفشي المرض في البلاد . هذا نعملوه في الأسابيع الأولى من مارس مع تخصيص ثلاثة سبيطارات نجمعو فيهم مرضى الكورونا وتكون عندهم طاقة إنعاش ب100 فرش . نعملو حجر مشدد على الناس الي الكورونا يمثل خطر كبير عليهم ونعملو تباعد إجتماعي بين الاخرين وماسكوات وغسلان يدين ونقعدو نتبعو …

إرتفع عدد الوفايات ومرضى الإنعاش لخمسين حالة نسكر البلاد قعد الوضع تحت السيطرة مانسكرش البلاد ونخلي الناس تسترزق . ونعمل سياسة إتصالية هادئة ومسؤولة وخاصة متواضعة نقول للتوانسة راو ماعناش حلّ ورانا ماعناش حقيقة مطلقة دونك باش نعملو سياسة مرنة خاطر إقتصاد بلادنا لا يحتمل وخاطر لحد الان الفيروس تحت السيطرة وباش نحط قواعد صارمة الي موش باش يلتزم عندو عقاب شديد … أحنا مالخوف سكرنا بلادنا وعنا صفر مريض في الإنعاش ومن صحة الراس ماشي في بالنا أنو عنا 800حالة نتبعو فيهم وشادين الفتلة ياخي البارح لقينا زوز حالات وهذا كف علمي كبير ودليل قاطع أنكم عندكم شهرين تطبقو في إستراتيجيا على الpartie apparente de l’iceberg ……

وماخفي كان أعظم ونهار الي تقتنعو أنكم غالطين في حساباتكم أتو تفهمو حجم الكارثة الإقتصادية والإجتماعية الي تسببتو فيها بالتعنت والغرور الأعمى متاعكم . آخر جملة : بعض الميليشيات الفايسبوكية بدات تعمل في تعاليق سياسية غبية و يتهمو فيا بمحاولة مهاجمة الحكومة راو الحكومة هذي دافعت عليها من نهار تعيين الفخفاخ بكل قوة وقت حزبكم كان يعمل في جميع المناورات باش يطيحها ولهذا راو هذا موضوع علمي ماعندو حتى علاقة بالسياسة وقوي على مخاخكم وبالعكس الحكومة والوزارة عملت مجهودات جبارة وتفوق طاقتها بآلاف المرات وحبينا والا كرهنا نجحو انهم يسبطرو عالوضع وتونس الى حد الآن محققة معجزة وما انجمو كان نقولو برافو عالمجهود … ولكن زادة كيف نشوفو عوج وتمشي غالط من واجب كل انسان يصلحو وينتقدو . ولهذا وكخلاصة الي صار صار توة كيفاش نخرجو من عنق الزجاجة :

* نعملو تحاليل لعينة au hasard مالمجتمع نهار الإثنين والثلاثاء و بعد نعملو رفع جزئي للحجر الجمعة الجاية مع إجراءات صارمة للتباعد الإجتماعي . ونعاودو نعملو تحاليل لعينة au hasard نهار الإثنين والثلاثاء الجايين ونقارنو لقينا تفشي سريع نسكر لقينا تفشي بطيء نواصل بنفس الاستراتيجيا لقينا مافماش تفشي نزيد نحلّ البلاد ونعاود تحليل الجمعة الي بعد أما الصراخ الهستيري شدو دياركم راو الجمعة الجاية باش نموتو الكل أصبح شيء مثير للسخرية

Advertisements

أخبار ذات صلة

Leave a Comment